Мәтіннен негізгі және қосымша ақпаратты анықтау Ең алғаш Олимпиадалық ойындар Ежелгі Грекияда Зевс құдайының құрметіне біздің заманымызға дейінгі 776 жылдан бастап төрт жылда бір рет Олимпия қаласында өткізілетін. Бұл ойындарда әскери дайындық, дене шынықтыру өнерін көрсету байқаулары, дәстүрге айналған ақындар мен шешендер айтысы, әр түрлі өнер көрмелері ұйымдастырылған. Олимпиада ойындары кезінде соғыстар тоқтатылып, тыныштық орнайтын дәстүр қалыптасқан. Осы кезде бір айдан үш айға дейін бүкіл Эллада жерінде қару жұмсауға, тіпті ойынды тамашалаушыларға қару-жарақпен келуге тыйым салынған. Ол кезде Олимпиада ойындары бес күн өткізілген. Бағдарламасына жүгіру, күрес, ат жарысы, қоссайыс, бессайыс сияқты спорт түрлері кірген. Жеңімпаздарға зәйтүн ағашының жапырағынан өрілген алқа кигізіліп, құрмет көрсетілген. Кейін біздің заманымыздағы 394 жылы Византия императоры Федосий І-нің бұйрығы бойынша тоқтатылды. Ал, 19 ғасырдың орта кезінде Грекияда олимпиада ойындарды қайта жандандыру мақсатында біраз әрекеттер жасалды. Сөйтіп, 1859, 1870, 1875 және 1889 жылдары Афинада грек спортшыларының қатысуымен секіру, жүгіру, диск, найза лақтыру, гимнастика сияқты спорт түрлерінен жарыстар өтті. Ал, 1896 жылы І Олимпиялық ойындарын Афина қаласында өткізу жөнінде шешім қабылдады Халықаралық олимпиада комитетінің тұңғыш басшысы болып грек Деметриус Викелас сайланды. Сөйтіп, қазіргі заманғы алғашқы Олимпиада ойындары 1896 жылы сәуір айының 6 – 15 аралығында Афинада өтіп, оған 13 елден 311 спортшы қатысты.